ఇటీవల కాలంలో మరే సినిమా కోసం దేశవ్యాప్తంగా సినీ ప్రియులు ‘కల్కి 2898 AD’ (కల్కి 2898 AD) కోసం ఎదురు చూస్తున్నారు. పాన్ ఇండియా స్టార్ ప్రభాస్ (ప్రభాస్) హీరోగా నటిస్తున్న ఈ సైన్స్ ఫిక్షన్ ఫిల్మ్ కి నాగ్ అశ్విన్ దర్శకుడు. వైజయంతి మూవీస్ అత్యంత భారీ బడ్జెట్ తో ఈ మూవీ జూన్ 27న ప్రేక్షకుల ముందుకు రానుంది. ఇప్పటికే విడుదలైన గ్లింప్స్, బుజ్జి టీజర్ ఆకట్టుకున్నాయి. తాజాగా ఈ చిత్ర ట్రైలర్ ను విడుదల చేశారు మేకర్స్.
3 నిమిషాల నిడివి గల ‘కల్కి 2898 AD’ ట్రైలర్ (Kalki 2898 AD Trailer) అద్భుతంగా ఉంది. విజువల్ వండర్ కి పర్యాయపదంగా ప్రతి ఫ్రేమ్ ఉంది. ఆ విజువల్స్ కి తగ్గట్టే బ్యాక్ గ్రౌండ్ స్కోర్ కూడా అదిరిపోయింది. ట్రైలర్ చూస్తున్నంత సేపు ఏదో హాలీవుడ్ మూవీ ట్రైలర్ చూస్తున్న ఫీలింగ్ కలుగుతోంది. ఒక కొత్త ప్రపంచానికి వెళ్లినట్లుగా ఉంది. ప్రభాస్ పోషించిన భైరవ పాత్ర ఎంత బలంగా ఉందో.. దానికి ధీటుగా అమితాబ్ బచ్చన్ పోషించిన అశ్వత్థామ పాత్ర విశేషం. ఇక “రికార్డ్స్ చూస్కో..ఇంత వరకు ఒక్క ఫైట్ కూడా ఓడిపోలేదు” అంటూ ప్రభాస్ పలికిన డైలాగ్ లు ఆకట్టుకున్నాయి. “భయపడకు మరో ప్రపంచం వస్తోంది” అంటూ కమల్ హాసన్ డైలాగ్ తో ట్రైలర్ ముగించిన తీరు భలే ఉంది. మొత్తానికి ట్రైలర్ చూస్తుంటే.. ఈ సినిమా విడుదలైన తర్వాత ఇండియన్ సినిమా చరిత్రలో ఒక్క రికార్డు కూడా మిగలదేమో అనిపిస్తోంది.
సంతోష్ నారాయణన్ సంగీతం అందించిన ‘కల్కి’ చిత్రంలో అమితాబ్ బచ్చన్, కమల్ హాసన్, దీపికా పదుకొనే, దిశా పటాని ముఖ్యపాత్రలు నటిస్తున్నారు.
